दुर्घटनाबाट उठेर सफलता हासिल गर्ने: पुल्चोकका उमंग जोशी संघीय लोकसेवामा हाइड्रोपावर इन्जिनियर
ललितपुर, पुल्चोक | २०७६ ब्याच — सिभिल इन्जिनियरिङ्गका विद्यार्थी उमंग जोशीले एक गम्भीर सडक दुर्घटनाबाट पुनःउठ्दै संघीय लोकसेवा आयोगको परीक्षामा उत्कृष्ट सफलता हात पारेका छन्। उनले पहिलो प्रयासमै सिभिल समूहतर्फ ११औं स्थान हासिल गर्दै राजपत्रांकित तृतीय श्रेणी, सातौं तह (हाइड्रोपावर इन्जिनियर) पद प्राप्त गरेका छन्।
२०७८ सालतिर, जब उनी ६औं सेमेस्टरमा थिए, एक गम्भीर सडक दुर्घटनामा परेका थिए। प्रारम्भिक अवस्थामा उनको देब्रे शरीर नचल्ने, भाषिक तथा मानसिक समस्याहरू देखिएका थिए। सेमेस्टरभरि कक्षामा अनुपस्थित भए पनि, उनले दृढ इच्छाशक्ति र कठिन परिश्रमका बलमा सेमेस्टर पार गरे।
साथीहरू, सिनियर-जुनियरहरूको माया र साथले उनले पुनःपठनमा फर्किन प्रेरणा पाए। दुर्घटनापछि केही समय उनका ग्रेडहरूमा गिरावट आयो — एग्ग्रिगेट ८०% भन्दा माथिको प्रदर्शनबाट क्रमशः ५९% र ६४% मा झरे। तर उमंगले कहिल्यै हार मानेनन्।
आज, उनले त्यही कठिनाइलाई शक्ति बनाउँदै, संघीय लोकसेवामा ठूलो सफलता हासिल गरेका छन्। पुल्चोक इन्जिनियरिङ क्याम्पसका विद्यार्थी मात्र नभई, सम्पूर्ण इन्जिनियरिङ विद्यार्थीहरूका लागि उमंग एक प्रेरणादायी उदाहरण बनेका छन्।
उहाँलाई हार्दिक बधाई!
“समस्या बाधा होइन, अवसर हो” भन्ने कुरालाई जीवन्त बनाएका छन् उमंग जोशी।
